هذيان

صوت كاميليا جبران و هى بتقول غريبة فى هذا العالم. كوبايات مرمية على الارض فاضية مش عارفة سكرت من اللى كان فيها ولا من ريحتك اللى كل ما نسمة هوا تيجى تجيبها و تجى تحاوطنى من كل ناحية. سيجارة مولعة فى ايدى بس مبشربهاش سايباها تتحرق و تاكل فى نفسها زى ما انا بتحرق و باكل فى نفسى من كتر ما انا مانعة نفسى عنك من كتر ما انا مش طايلاكى و انتى قدامى. عينيك فى عنيا. بصالك و بصالى و انتى عارفة ايه بيدور فى دماغى ونا عارفة انك عارفة و يمكن بيدور فى دماغك نفس الكلام و فضلت بصالك و بقولك بعنيا كل اللى نفسى اعمله و ازاى نفسى المسك بس مش جسمك خالص , المس روحك و اشمها و ابوس كل حتة فيها و احضنها اوى لحد ما تبقى هى و روحى واحد ادوب فيكى و كيانك يحاوطنى من كل حتة و نبقى كيان واحد وجود واحد حضور واحد .. يااه نفسى فى حاجات كتير اوى بس مش هعمل حاجة .. هفضل قاعدة كده اتفرج عليكى من قريب بس برضه مش بالقرب اللى نفسى فيه بس مقدرش اقرب اكتر من كدة ولا اقدر اشوه نقاءك بلمسة منى, و ازاى المسك اذا كانت موناليزا ديفينشى محفوظة فى متحف خلف اسوار و الكل يتعجب جمالها عن بعد امتار فكيف لى انا ان المسك و انتى موناليزا الخالق ؟

غريبة في هذا العالم..
غريبة ..
وفي الغربة وحدة قاسية..
ووحشة موجعة ..
غير أنها تجعلني أفكر أبداً
بوطن سحري لا أعرفه

وتملأ احلامي بأشباح أرض قصيّة ما رأتها عيني
غريبة في هذا العالم
وقد جبت مشارق الأرض ومغاربها
فلم أجد مسقط رأسي ولا لقيت من يعرفني ولا من يسمع بي