وقت أما فرقنا السكوت

مع مرور الوقت علاقتنا مع نفسنا, مع الناس اللى بنحبها أو حتى أصدقائنا بتفقد حدتها أو كثافتها, علاقتنا بكل حاجة بقت ضحلة جداً معما تعمقنا و قربنا, الأحاسيس نفسها مبقتش بنفس قوتها, كل حاجة بتفقد ملامحها مع الوقت, الحضن مبقاش دافي زي الأول, البوسة مبقالهاش طعم و معظم الناس بقى وجودها زى غيابها مهما كانت أهميتهم فى حياتنا, الفقد بقى أسلوب حياة, فى الوقت اللى إحنا بنفتقد فيه كل حاجة, و كل ما الأفتقاد يزيد كل ما الفقد يكتر, و كأنك كل ما تحتاج هتخسر, فتلجأ للزهد, و تبدأ كل حاجة كنت بتجري وراها تيجي لوحدها بس خلاص أنت مبقتش عايزها ولا بقيت عايز حاجة. مبقناش نتخانق و نزعق و نمسك فى حاجة أو حد, مش عارفة أن كان إستسلام أم إذعان, بنزهد عشان مش عايزين ولا عشان خايفين نعوز, مش فارقة كتير النتيجة واحدة, إننا مبقناش عايزين خلاص, أكتشفت إنهاردة إني مبقتش أمسك أو أخاف على أي حاجة, اللى ييجي ييجي و اللى يروح يروح, مبقتش أزعل حتى للدرجة إنى ألوم بيها حد على حاجة عملها أو معملهاش, علاقاتي بالناس بتنتهي فى هدوء, لا بلوم ولا بعاتب ولا بتخانق, مجرد سكوت, بنتكلم بس ساكتين, حتى علاقتي بنفسى بتتخللها فترات من السكوت و الفتور مش مع الناس بس. الحاجات مبقتش تخلص, بقت بتتلاشي و ملامحنا بتضيع فى الأثناء.