عن

لا أحب من الحب سوى البدايات - محمود درويش

عن أول حاجة فى كل حاجة.
عن أول مكالمة تليفون بتنسى نفسك فيها و مبتفوقش إلا لما المكالمة تفصل عشان ساعة عدت.
عن أول " أحنا " بتتقال من غير قصد.
عن الأبتسامة اللى أبتسمتها بعد ما حسيت أن " أنا " و " أنت " بقينا "إحنا" فعلاً.
عن أول لمسة إيد من غير قصد و النور اللى عدى من جلدك لجلدى و دخل أستخبى جوايا مع كل حاجة مخبياها من قسوة الزمن.
عن أول مرة بتمدلى أيدك و بمدلك أيدى و نمشى فى الشارع كأننا واحد مش أتنين.
عن إحساس الأمان فى أيدك كأن أبويا رجعلى و أنا رجعت طفلة صغيرة مفيش حاجة ممكن تأذيها و هى مستخبية و بتلعب فى خطوط كفك.
عن أول بوسة بتيجى وسط الكلام من غير قصد.
عن أول بوسة بتتخطف و الناس مش باصين بس المرادى عن قصد.
عن الشغف اللى مبينطفيش.
عن أول خناقة مبتستمرش أكتر من ربع ساعة.
عن حلاوة الصلح بعد أول خناقة.
عن أول حضن اللى بندعى جوانا أن الزمن يقف على كده.
عن أول " بحبك " بتتقال و كمية الصدق اللى فيها قبل ما نبتذلها بترديدها كتير.
عن أول كلمة بحبك أتقالت من غير نفس.
عن أول خناقة أتصالحنا بس عشان الدنيا تمشى.
عن أول إنطفاء للشوق.
عن أول كدبة بيضا اتقالت عشان تعدى مشكلة فعملت مشكلة أكبر منها.
عن أول أنا و أول أنت فمبقاش فى إحنا.
عن أول ذكرى حلوة بنفتكر فيها عشان مبقاش فى بينا حاجة حلوة.
عن أول مرة ننام متخانقين.
عن أول سكوت عشان مبقاش فى كلام.
عن أول مرة بطلنا نحاول.
عن أول مرة نعترف أن أحنا خلاص مبقناش أحنا.
عن أول نهاية.
عن أول كسرة قلب مبيتصلحش بعدها أبداً.